News

Si nou téi anparl ankor in kou noute kréol rényoné ? – Oté

Lakey lo sit > Chroniques > Oté


Mi pans i tonb bien, i fo dir toulézour i tonb bien…


Mézami si mi di sa i tonb bien sé pou plizyèr rézon :

Inn zéléksyon dépité i ariv, é néna dopi in bon koupe de tan in mouvman pou done bande lang la pa fransé inn méyèr plass dann la vi d’moune, dann ladministrassion é pi lékol. La loi lé voté sé la loi Molac même si konsèye konstitisyonèl la koupe in boute dossi – zot i pé oir sa dsi zot téléfone é obliye pa alé rodé pou konprande i anparl de koi.

Dézyèmman pars sanm pou mwin bande partizan la lang kréol La Rényon la marke in bonpé lo poin dopi kék zané : néna CAPES kréol, néna l’agrégassion, noute lang lé pi bani dann lékol mèm si i fo ni sava pli loin mé nou néna lo tan pou anparlé.

Troizyèm rézon : Tikouti édission i sorte fé parète in gayar gramèr pédagojik noute kréol rényoné. Ziska zordi mwin la vu sa do loin épi mwin la lire lo nouvèl dsi face book é ziss néna in néstan mwin la agarde si Rényon Promyèr zournal parlé avèk in l’invité i apèl Axel Gauvin, prézidan lofis la lang.

Oui mézami, in gramèr pédagojik noute lang kréol la Rényon i sorte parète : In bèl galé 900 paze avèk toute bande varyété noute lang san mèt pèrsone a l’ékar. Sak la fé sa apré in travaye la dir plizyèr zané sé Danièle Quartier – socio linguiste – avèk Axel Gauvin, prézidan lofis la lang kréol la réunion, ékrivin.

Pou kissa in liv konmsa ? Pou toute demoune lé intéréssé, mèm passioné par nout lang kréol rényoné kissoi sak i koné noute lang é i vé aprofondi son konéssans, kissoi bande zamontrèr noute lang dan lékol, kissoi ninporte kissa ki yème nout lang sansa lé assé kiryé pou konète in pé myé la lang parlé par pliss 80 % bande rényoné.

É akoze pa aprann noute lang kréol son tousèl otroman a plizyèr avèk konm baze lo liv gramèr pédagozik. Akoz pa, mi panss sa i doizète possib avèk anpliss toute sak néna dsi linternet… Mézami mi souète azot in bone léktir, é pétète ni pé artrouvé pou shakinn di sak li panss in liv konmsa.

A bon ékoutèr, salu !

Justin


Inn modékri, inn ti lavi, inn komantèr ?

signaler contenu

Source link

Leave a Reply

Your email address will not be published.